Friday, December 26, 2008

ဂေါပက ဖွဲ့စည်းခြင်း နှင့် တရားပွဲ ဖိတ်ကြားခြင်း



ဘုန်းတော်ကြီးကျောင်း ဂေါပက ဖွဲ့စည်းခြင်း နှင့် တရားပွဲ ဖိတ်ကြားခြင်း


ဒီဇင်ဘာလ ၂၆ ရက်နေ့ ၂၀၀၈ ခုနှစ်


ကော်လိုရာဒိုပြည်နယ်ရှိ ဗုဒ္ဓဘာသာဝင် မိသားစုများ၏ သဒ္ဓါတရားထက်သန် စွာဖြင့် စုပေါင်းအလှူငွေ ထည့်ဝင်မှုနှင့် ဘုန်းတော်ကြီးကျောင်းဖြစ်မြောက်ရေး ကော်မတီ၏ ကြိုးပမ်းအားထုတ်မှုတို့ကြောင့် ဗုဒ္ဓဘာသာ ဘုန်းတော်ကြီး ကျောင်းတဆောင်အား စတင် ငှားရမ်းနိုင်ခဲ့ပြီးဖြစ်ပါသည်။ အဆိုပါ ကျောင်းတော်တွင် သတင်းသုံးမည့် ဘုန်းတော်ကြီးလည်း ၂ဝဝ၉ ခုနှစ် ဇန်နဝါရီလ ၃ ရက်နေ့ ည ၈ နာရီခွဲတွင် ကြွရောက်လာမည်ဖြစ်ပါသည်။


သို့ပါသဖြင့် ဘုန်းတော်ကြီးကျောင်း စတင်လည်ပတ်နိုင်ရေး၊ ကျောင်း၏ ဝေယဝစ္စလုပ်ငန်းများ ဆွေးနွေးနိုင်ရေး၊ ဘုန်းတော်ကြီးကျောင်း ဂေါပကအဖွဲ့ကို အများဆန္ဒနှင့်အညီ ဖွဲ့စည်းခြင်း နှင့် တရားပွဲကို အောက်ပါ အစီအစဉ်အတိုင်း ပြုလုပ်မည်ဖြစ်ပါ၍ မပျက်မကွက် တက်ရောက်ကြပါရန် လေးစားစွာ ဖိတ်ကြား အပ်ပါသည်။


မှတ်ချက်။ ။ နေ့စဉ် (သို့မဟုတ်) အပတ်စဉ် အာရုံဆွမ်း နှင့် နေ့ဆွမ်းအလှူရှင်များ၊ ဘုန်းတော်ကြီးကျောင်းအတွက် လိုအပ်သော အသုံးအဆောင်ပစ္စည်းများကို လည်း ဆက်သွယ် လှူဒါန်းနိုင်ကြောင်း နိုးဆော်အပ်ပါသည်။


ဘုန်းတော်ကြီးကျောင်းဖြစ်မြောက်ရေး ကော်မတီ


အစီအစဉ်


နေ့ရက်

ဇန်နဝါရီလ ၁ ရက် ၂ဝဝ၉ ခုနှစ် (ကြာသပတေးနေ့) ဂေါပကအဖွဲ့ ဖွဲ့စည်းခြင်း

ဇန်နဝါရီလ ၄ ရက် ၂ဝဝ၉ ခုနှစ် (တနင်္ဂနွေနေ့) တရားပွဲကျင်းပခြင်း


အချိန်

နေ့လည် ၁ နာရီ


နေရာ

ဓမ္မပါလ ဘုန်းတော်ကြီးကျောင်း

1725 Elmira Street

Aurora CO 80010


ဆက်သွယ်ရန် ဖုန်းနံပတ်


ကိုစိုးနိုင် (၇၂၀ ၃၂၄ ၀၃၅၂)

ကိုမျိုး (၃၀၃ ၉၆၀ ၅၉၀၁)

မသန္တာ (၃၀၃ ၆၆၈ ၁၄၅၈)

ကိုခင်မောင်သန်း (၃၀၃ ၃၄၃ ၁၀၉၂)


Thursday, December 25, 2008

ဘုန်းတော်ကြီးကျောင်းဖွင့်ပွဲနှင့် တရားပွဲ ကျင်းပမည်


ဘုန်းတော်ကြီးကျောင်းပြုလုပ်ရန် ငှားရမ်းထားသည့် အိမ်


ဗုဒ္ဓဘာသာ ဘုန်းတော်ကြီးကျောင်းသစ် ဖွင့်ပွဲ နှင့် တရားပွဲ ကျင်းပမည်


ဒီဇင်ဘာလ ၂၅ ရက်နေ့ ၂၀၀၈ ခုနှစ်


ကော်လိုရာဒိုပြည်နယ်ရောက် ဗုဒ္ဓဘာသာ မိသားစုများမှ မြန်မာဘုန်းတော်ကြီး ကျောင်းတဆောင်ဖြစ်မြောက်လာစေရေးအတွက် ကြိုးစားဆောင်ရွက်လျှက်ရှိရာ ယခုအခါ ဘုန်းတော်ကြီးကျောင်းဆောင်တခု ဖြစ်မြောက်သွားသည့်အတွက် ကျောင်းသစ်ဖွင့်ပွဲ နှင့် တရားပွဲ ကျင်းပမည်ဖြစ်ကြောင်း သိရသည်။


“ကျနော်တို့ ဗုဒ္ဓဘာသာ မိသားစုတွေ စုပေါင်း ကြိုးစားစီစဉ်နေတဲ့ ဘုန်းတော်ကြီးကျောင်းတခုတော့ ဖြစ်မြောက်သွားပါပြီ။ ကျောင်းအတွက် အိမ်တလုံးငှား ပြီးသွားပြီ။ ကျောင်းထိုင်ဖို့အတွက် ဘုန်းတော်ကြီး တပါးကိုလည်း ပင့်ထားပြီးပါပြီ။ နောက်နှစ် ဇန်နဝါရီလ ၃ ရက်နေ့မှာ ကြွရောက်လာမှာ ဖြစ်ပါတယ်” ဟု ဘုန်းတော်ကြီးကျောင်း ဖြစ်မြောက်ရေးကော်မတီဝင် ကိုစိုးနိုင် က ပြောသည်။


ဘုန်းတော်ကြီးကျောင်းအမည်အား ‘ဓမ္မပါလ’ ဟု အမည်သမုဒ်ထားပြီး အင်ဒီးယား နားပြည်နယ် ဖို့ဝိန်းမြို့တွင် သတင်းသုံးနေတော်မူသော ဘုန်းတော်ကြီး တပါးမှ လာရောက်၍ သာသနာ့ဝန်ထမ်းမည် ဟု သိရသည်။


“ဘုန်းတော်ကြီးများ ကြွရောက်လာတာနဲ့ ဒီပြည်နယ်မှာရှိနေတဲ့ ဗုဒ္ဓဘာသာမိသားစုဝင်အားလုံး ပါဝင်နိုင်မယ့် အစည်းအဝေးတခုလုပ်ပြီး အများဆန္ဒနဲ့အညီ ဘုန်းတော်ကြီးကျောင်း ဂေါပကအဖွဲ့ကို ဖွဲ့စည်းမှာဖြစ်ပါတယ်၊ အဲဒီက ဖြစ်ပေါ်လာမယ့် ဂေါပကအဖွဲ့ကို ဖြစ်မြောက်ရေးကော်မတီက လွှဲပြောင်းပေးစရာတွေကို လွှဲပြောင်းပေးပြီး ဂေါပကအဖွဲ့ကနေ ဆက်လက်ပြီး ဘုန်းတော်ကြီးကျောင်းနဲ့ပတ်သတ်တာတွေကို တာဝန်ယူ လုပ်ဆောင်ပေး သွားမှာပါ” ဟု ၎င်းက ဆက်လက်ပြောဆိုသည်။


လာမည့် ၂၀၀၉ ခုနှစ် ဇန်နဝါရီလ ၁ ရက်နေ့တွင် ဘုန်းတော်ကြီးကျောင်း ဂေါပကအဖွဲ့ ဖွဲ့စည်းရေး ဆွေးနွေးပွဲ ပြုလုပ်မှာဖြစ်ပြီး ၄ ရက်နေ့တွင် တရားပွဲကျင်းပမည်ဟု သိရသည်။ ဘုန်းတော်ကြီးကျောင်းဖွင့်ပွဲအခမ်းအနားကို တော့ ဇန်နဝါရီလ ၁၀ ရက်နေ့တွင် ကျင်းပပြုလုပ်သွားရန် စီစဉ်နေကြောင်းလည်း သိရှိရသည်။ ။


Monday, December 1, 2008

ဘုန်းတော်ကြီးကျောင်းဖြစ်မြောက်ရေးနှင့် အသင်းလပတ်အစည်းအဝေး ကျင်းပ



ဗုဒ္ဓဘာသာ ဘုန်းတော်ကြီးကျောင်း

ဖြစ်မြောက်ရေးကော်မတီ အစည်းအဝေး နှင့်

မြန်မာနိုင်ငံသားများအသင်း လပတ်အစည်းအဝေး ကျင်းပ


ဒီဇင်ဘာ ၁ ရက် ၂၀၀၈ ခုနှစ်


ဗုဒ္ဓဘာသာ ဘုန်းတော်ကြီးကျောင်း ဖြစ်မြောက်ရေးကော်မတီ အစည်းအဝေး နှင့် ကော်လိုရာဒိုပြည်နယ်ရောက် မြန်မာနိုင်ငံသားများအသင်း၏ လပတ် အစည်းအဝေးကို နိုဝင်ဘာလ ၂၇ ရက်နေ့က ဒန်ဗာမြို့ ဇီနီယာတိုက်ခန်းရှိ အစည်းအဝေးခန်းမတွင် ကျင်းပခဲ့ကြောင်း သိရသည်။


ဘုန်းတော်ကြီးကျောင်း ဖြစ်မြောက်ရေးအစည်းအဝေးသို့ ဖြစ်မြောက်ရေး ကော်မတီဝင်များနှင့် အလှူရှင်အချို့ တက်ရောက်ခဲ့ကြသည်။


“အခုဆိုရင် ဘုန်းတော်ကြီးကျောင်းအတွက် လူနေအိမ်တလုံးကို ရှာဖွေ ပြီးသွားပါပြီ။ ကျောင်းထိုင်ဖို့အတွက် ဘုန်းတော်ကြီးတပါးကိုလည်း ပင့်ဆောင်ထားပြီးပါပြီ။ နောက်နှစ် ၂၀၀၉ ခုနှစ် နှစ်ဆန်းပိုင်းမှာ ဘုန်းတော်ကြီး ကျောင်းကို စတင်လည်ပတ်မှာ ဖြစ်ပါတယ်” ဟု ကော်မတီအဖွဲ့ဝင်တဦးက ဆိုသည်။


ထို့ပြင် အလှူငွေ ဆက်လက်ကောက်ခံခြင်းနှင့် သက်ဆိုင်ရာ အဖွဲ့အစည်းများထံတွင် ဘာသာရေးနဲ့သက်ဆိုင်သည့် အသင်းအပင်းဖွဲ့ ဖွဲ့စည်းမှု လျှောက်ထားခြင်းများကို ဆက်လက်လုပ်ဆောင်သွားမည်ဟုလည်း ၄င်းက ဆက်လက်ပြောဆိုခဲ့သည်။


ဘုန်းတော်ကြီးကျောင်းဖြစ်မြောက်ရေးကော်မတီကို အောက်တိုဘာလ ၅ ရက်နေ့က စတင်ဖွဲ့စည်းခဲ့ပြီး ကော်လိုရာဒိုပြည်နယ်အတွင်း ဗုဒ္ဓဘာသာ ဘုန်းတော်ကြီးကျောင်းတဆောင် ဖြစ်မြောက်ရေးအတွက် ဝိုင်းဝန်းဆောင်ရွက် နေခြင်းဖြစ်သည်။



ထို့နောက် ဆက်လက် ကော်လိုရာဒိုပြည်နယ်ရောက် မြန်မာနိုင်ငံသားများ အသင်း၏ လပတ်အစည်းအဝေးကို ဆက်လက်ပြုလုပ်ခဲ့သည်။


အသင်း၏လပတ်အစည်းအဝေးသို့ ဦးဆောင်ကော်မတီဝင်များ၊ အသင်း စည်းရုံးရေးမှူးများ တက်ရောက်ခဲ့ကြပြီး အသင်း၏ လုပ်ငန်းစဉ်များကို ပြန်လည် သုံးသပ်ခြင်း၊ ရှေ့လုပ်ငန်းစဉ်များကို ဆွေးနွေးခြင်းများကို ပြုလုပ်ခဲ့ကြောင်း သိရသည်။


Friday, November 28, 2008

အဝတ်အထည် နှင့် အသုံးအဆောင်ပစ္စည်းများ ဝေငှ (ဓာတ်ပုံ သတင်း)


ဓာတ်ပုံသတင်း

နိုဝင်ဘာလ ၂၇ ရက် ၂၀၀၈ ခုနှစ်


ကော်လိုရာဒိုပြည်နယ်ရောက် မြန်မာနိုင်ငံသားများအသင်းမှ

မြန်မာမိသားစုများအား အဝတ်အထည် နှင့်

အသုံးအဆောင်ပစ္စည်းများ ဝေငှနေစဉ်။


Monday, November 3, 2008

လာအို ကထိန်ပွဲ

ကော်လိုရာဒိုပြည်နယ်ရောက် မြန်မာပြည်သားများ

လာအို ကထိန်ပွဲတွင် ပူးပေါင်းဆင်နွှဲ

နိုဝင်ဘာလ ၃ ရက် ၂၀၀၈ ခုနှစ်


အောက်တိုဘာလ ၂ ရက်နေ့က ကော်လိုရာဒိုပြည်နယ် ဘရိုက်တန်မြို့ရှိ လာအိုဘုန်းတော်ကြီးကျောင်းတွင် ကျင်းပခဲ့သည့် ကထိန်ပွဲတွင် ကော်လိုရာဒိုပြည်နယ်ရောက် မြန်မာပြည်သားများ သွားရောက်ပူးပေါင်းဆင်နွှဲ ခဲ့ကြကြောင်း သိရသည်။


“အခုလို စည်စည်ကားကားနဲ့ ဘာသာရေးပွဲလမ်းသဘင်တွေကိုတွေ့တော့ မြန်မာပြည်ကို အရမ်းသတိရတယ်။ အခု ဒီကထိန်ပွဲကို သားတွေ သမီးတွေက အရမ်းလိုက်ချင်တာ၊ ကားအခက်အခဲကြောင့် သူ့တို့ကို ထားခဲ့ရတယ်” ဟု မကြာမီကမှ ကော်လိုရာဒိုပြည်နယ်သို့ရောက်ရှိလာသည့် ဦးသိန်းစိုး က ဆိုသည်။

လာအိုကထိန်ပွဲသည် နှစ်စဉ်ပြုလုပ်လေ့ရှိပြီး ယခုနှစ်တွင် မြန်မာနိုင်ငံသား အများစု သွားရောက်ပူးပေါင်းဆင်နွှဲ ခဲ့ခြင်းလည်းဖြစ်သည်။ အဆိုပါ လာအိုကျောင်းတွင် သတင်းသုံးနေထိုင်နေသော ဘုန်းတော်ကြီးများမှာ မြန်မာနိုင်ငံသားဘုန်းတော်ကြီးများ ဖြစ်သည့်အတွက် ကော်လိုရာဒိုပြည်နယ်ရောက် မြန်မာနိုင်ငံသားများ အနေဖြင့် အလှူအတန်းများကို ထိုကျောင်းတွင်သာ အများဆုံး သွားရောက်လှူဒါန်းပြုလုပ်လေ့ရှိသည်။


“တနှစ်လုံး ကျောင်းတကျောင်းမှာ တခါသာပြုလုပ်လို့ရတဲ့ အလှူအတန်းဖြစ်တာမို့ ကြုံတောင့်ကြုံခဲ အလှူဖြစ် တယ်။ နောင်နှစ်တွေမှာလည်း အခုလို လာရောက်ပူးပေါင်း လှူဒါန်းဖို့လည်း ဖိတ်ကြားပါတယ်” ဟု ထိုကျောင်း တွင် သတင်းသုံးနေတော်မူသော အရှင် ဆန္ဒမနောက မိန့်ကြားတော်မူသည်။

ကော်လိုရာဒိုပြည်နယ်တွင် မြန်မာနိုင်ငံမှလာရောက်နေထိုင်အခြေချသူ ၇၀၀ ကျော်ရှိကာ ထိုအထဲတွင် ဗုဒ္ဓဘာသာဝင် မိသားစု ၄၀ ကျော်ခန့်ရှိပြီး မြန်မာဗုဒ္ဓဘာသာ ဘုန်းတော်ကြီးကျောင်းတဆောင်ဖြစ်မြောက်ရေး အတွက် ကြိုးစားဆောင်ရွက်နေကြကြောင်းလည်း သိရသည်။


Sunday, November 2, 2008

ပန်းတော့ အနုပညာ လက်ရာ


Negative thinking is suffering, Positive thinking is freedom!

နိုဝင်ဘာလ ၂ ရက်၊ ၂၀၀၈ ခုနှစ်


ကော်လိုရာဒိုပြည်နယ် ဘရိုက်တန်မြို့ရှိ လာအိုဘုန်းတော်ကြီးကျောင်း

WAT BUDDHAPUNYARAM OF CO တွင် သတင်းသုံးနေတော်မူသော

မြန်မာဘုန်းတော်ကြီး အရှင် စန္ဒာမနော ခေါ် နွန်းမ် နှင့်

သူရဲ့ မြန်မာ့ ပန်းတော့ အနုပညာလက်ရာအချို့

ဘုရားမတင် နတ်မ၀င် လူတွင် ပန်း ၁၀ မျိုး


၁။ ပန်းထိမ် (ရွှေ ငွေ ကို လက်ဝတ်တန်ဆာ စသည် ပြုလုပ်သည့် အတတ်ပညာ)

၂။ ပန်းပဲ (သံထည်အမျိုးမျိုး သွန်းထုသည့် အတတ်ပညာ)

၃။ ပန်းတဉ်း (ကြေးထည်အမျိုးမျိုး သွန်းထုလုပ်ကိုင်သည့် အတတ်ပညာ)

၎။ ပန်းပု (သစ်သား ဆင်စွယ် စသည်တို့ကို ရုပ်လုံး ရုပ်ကြွ ထွင်းထုသော အတတ်ပညာ)

(၅။ ပန်းပွတ် (သစ်သား ဆင်စွယ် စသည်တို့ကို ပွတ်ခံ၍ ပုံဖော်သည့် အတတ်ပညာ)

၆။ ပန်းချီ (ရုပ်ပုံရေးချယ်သော အတတ်ပညာ)

၇။ ပန်းယွန်း (ယွန်းထည် ပြုလုပ်သော အတတ်ပညာ)

၈။ ပန်းတော့ (အင်္ဂတေသရွတ်ဖြင့် ရုပ်လုံး ရုပ်ကြွဖော်သော အတတ်ပညာ)

၉။ ပန်းတမော့ (ကျောက်ဆစ် အတတ်ပညာ)

၁၀။ ပန်းရန် (အုတ် အင်္ဂတေ တို့ဖြင့် အဆောက်အအုံလုပ်သည့် အတတ်ပညာ)

(ပန်းရန်အစား ပန်းရွဲ (ကျောက်သွေး အတတ်ပညာ) ဟူ၍လည်း ရေတွက်ကြသည်)


Saturday, November 1, 2008

သတင်း မိုးမခ

အမေရိကန် ၂၀၁၀ သန်းခေါင်စာရင်းတွင်

မြန်မာပြည်ဖွားတို့ စာရင်းပေါက်ရန် လိုအပ်ဟု ဆို


မိုးမခ အထောက်တော် ၀၀၂

အောက်တိုဘာ ၂၉၊ ၂၀၀၈


လာမည့် ၂၀၁၀ တွင် အမေရိကန်ပြည်ထောင်စုက နိုင်ငံသားတို့၏ သန်းခေါင်စာရင်း ကောက်ယူမည် ဖြစ်ရာ မြန်မာပြည်ဖွား မြန်မာပြည်သားတို့ကလည်း “မြန်မာ” ဆိုသော စာရင်းပေါက်ရန်၊ တိုင်းပြည်တွင် မြန်မာဦးရေ မည်မျှရှိနေသည်ဟူသော စာရင်းအတိအကျ ပေါက်ရန်အတွက် ၀ိုင်းဝန်းဆောင်ရွက်ကြရေး ဆွေးနွေးနေကြ သည်။


မြန်မာလူမျိုး မိသားစုဦးရေ သောင်းဂဏန်းရှိသည်ဟုသာ ခန့်မှန်းနိုင်ပြီး စာရင်းအတိအကျ မထုတ်ပြန်နိုင်သည့် ကယ်လီဖိုးနီးယား ဘေးဧရိယာတွင်နေထိုင်ကြသည့် မြန်မာအစုအဖွဲ့အချို့နှင့် စိတ်ဝင်စားသူတို့ မေတ္တာနန္ဒ၀ိဟာရ ကျောင်းတိုက်တွင် လွန်ခဲ့သည် ရက်သတ္တပတ် တနင်္ဂနွေနေ့ ( အောက်တိုဘာ ၂၆၊ ၂၀၀၈) က အလွတ်သဘော တွေ့ဆုံကြပြီး မိမိတို့သဘောထားများကို ထုတ်ဖော်တင်ပြကြသည်။


ဝိုင်းဝန်းဆွေးနွေးကြရာတွင် အမေရိကန်ပြည်ထောင်စု၌ ၁၀ နှစ် တကြိမ် သန်းခေါင်စာရင်းကောက်၍ လူဦးရေနှင့် လူမျိုးစုစာရင်းကို ကောက်ယူပြုစု ထုတ်ပြန်လေ့ရှိကြောင်း၊ လူမျိုးစု ဦးရေ မည်ရွေ့မည်မျှ ရှိသည့်စာရင်းကို ကြည့်ပြီး နိုင်ငံတော်နှင့် ပြည်နယ်များက စီမံကိန်းများ၊ အကူအညီများ၊ ခွဲတမ်းများ ချမှတ်လေ့ရှိကြောင်း၊ ပေါ်လစီ(မူဝါဒ)များ ချမှတ်လေ့ရှိကြောင်း၊ ယခုအချိန်တွင် မြန်မာပြည်မှ ပြောင်းရွှေ့အခြေချလာသည့် မြန်မာပြည်ဖွားတို့ ယခု ၁၀ နှစ်အတွင်း အများအပြား တိုးပွားလာသည်ကို တွေ့ရှိနေရသော်လည်း လူဦးရေ စာရင်း အတိအကျ ထုတ်ဖော်မပြောနိုင်သေးသဖြင့် အခြား လူမျိုးများနှင့် နှိုင်းယှဉ်ပါက လူနည်းစုတို့ကို ဦးစားပေးရမည့် အခွင့်အရေးနှင့် ခံစားခွင့်တို့ကို မရနိုင်ဘဲ နစ်နာမှုများရှိနေကြောင်း၊ အထူးသဖြင့် ပညာရေး၊ လူမှုဖူလုံရေး၊ ကျန်းမာရေး အထောက်အကူ၊ သက်ကြီးရွယ်အိုစောင့်ရှောက်မှု စသည့် အရေးကိစ္စများတွင် လူနည်းစုများအဖြစ် အထူးကာကွယ်စောင့်ရှောက် ဦးစားပေးမှုတို့ကို မြန်မာတို့ မရရှိ၊ မသိရှိရဘဲ ဥပက္ခာပြု ခံထားရကြောင်း၊ ထိုအရေးကိစ္စများကို ပညာပေးရန်၊ ၀ိုင်းဝန်းပြီး အတူတကွ တစည်းတလုံးတည်း ဆောင်ရွက်ကြ ရန် လိုအပ်ကြောင်း ဆွေးနွေးကြသည်ဟု သိရသည်။


တဦးက ဆွေးနွေးရာတွင် -


“ကျမတို့က မြန်မာပြည်ဖွား "တရုတ်"လူမျိုးဆိုတော့ ဒီမှာ ဖောင်ဖြည့်ရင် တရုတ်လို့ ဖြည့်တယ်။ တရုတ်လို့ ဖြည့်လိုက်တော့ ကျမက တရုတ်ပြည်မကြီးက တရုတ်တွေအဖြစ် ဒီအစိုးရက စာရင်းထဲ ပေါင်းထည့်လိုက်ရော။ မြန်မာလို့သာရေးခဲ့ရင် မြန်မာဆိုတဲ့ အရေအတွက်စာရင်း တခုပေါက်သွားမှာပေါ့။ ဖြည့်လို့ရတဲ့ ပုံစံက “အခြားသော အာရှသားများ” (Other Asians) ဆိုတဲ့ စာသားကို အမှန်ခြစ်၊ နောက်ကကွက်လပ်မှာ - “မြန်မာ” (Burmese) လို့ဖြည့် အဲသလို ဖြစ်ရမှာ” ဟု တင်ပြခဲ့သည်။


ကျောင်းသားဖခင်တဦးက -


“ကျနော့်ကလေးက ကျောင်းလျှောက်တော့ “မြန်မာ” လို့ ဖြည့်လိုက်တယ်။ တရုတ်လည်း မဖြည့်ဘူး၊ တခြားလည်း မဖြည့်ဘူး။ ကျောင်းက အမှတ်တွေကို စစ်တယ်။ အမှတ်ကောင်းတာချင်းတူနေရင် ဦးစားပေးရမယ့် လူနည်းစု စာရင်းနဲ့ ဇကာ(ဆန်ခါ)တိုက်တယ်။ သူက မြန်မာဆိုတဲ့ လူနည်းစုဖြစ်နေတော့ ကျောင်းဝင်ခွင့်ရသွား တယ်ဗျ။ သဘောက သူက အခြား အာရှသားတယောက်လို့ ပေါ့ပေါ့ဆဆ ဖြည့်လိုက်ရင် အဲဒီ စာရင်း သတ်မှတ်ချက်က နည်းနေရင် အပြိုင်အဆိုင်များတာပေါ့။ ” ဟု သူ့အတွေ့အကြုံကို ပြောပြသည်။


မြန်မာပြည်ဖွားများတွင် တိုင်းရင်းသားများ၊ အခြားလူမျိုးများဟူ၍ အမျိုးမျိုးအဖုံဖုံ ရှိနေသည့်အရေးနှင့် ယခု အမေရိကန် သန်းခေါင်စာရင်းတွင် “Burmese” ဟူပြီး ဖြည့်ရမည့်ကိစ္စကိုလည်း သူတို့ ၀ိုင်းဝန်းဆွေးနွေး စဉ်းစားခဲ့ကြသည်ကို တွေ့ရသည်။


“ဥပမာဗျာ - ကျနော်က တရုတ်လူမျိုး၊ မြန်မာပြည်ဖွား။ ပြီးတော့ ကျနော်တို့ တရုတ်တွေမှာ မျိုးနွယ်စု ကွဲပြားတာတွေ ရှိတယ်။ ဘာသာစကားပြောတာ ကွဲပြားတာလည်း ရှိတယ်။ ဒါပေမယ့် တစိမ်းတွေ မျက်စိရှေ့မှာ ကျနော်တို့အားလုံးဟာ တရုတ်ပဲ။ ကွမ်းတုံတို့ ဖုကျင့်တို့ဆိုပြီး ခွဲပြီး ပြောမနေတော့ဘူးလေ။ အခုအချိန်မှာ ကျနော်တို့က မြန်မာပြည်ရဲ့ ဘယ်ဒေသက၊ ဘယ် လူမျိုးစုက ဆိုတာမျိုးကို မပြောသေးဘဲ အမေရိကန်စနစ်မှာ ပုံစံတခုဝင်သွားအောင် တညီတညွတ်တည်း ဆောင်ရွက်ဖို့လိုမယ် ထင်ပါတယ်။ ကျနော်က အခုဆို “တရုတ်”လို့ ဖောင်တွေမှာ မဖြည့်တော့ဘူးလေ၊ “မြန်မာ” လို့ ဖြည့်တယ်” ဟု တဦးက သူ့အမြင်ကို ရှင်းပြခဲ့သည်။


ယခုအချိန်တွင် အမေရိကန်အစိုးရစနစ်က မြန်မာပြည်ကို “Burma”၊ မြန်မာပြည်သားကို “Burmese” ဟု ရုံးစာတွင် သတ်မှတ်ထားရာ နိုင်ငံရေး၊ လူမှုရေး၊ လူမျိုးရေး အခြေခံတို့ကို ချဲ့ထွင်စဉ်းစားခြင်းကို ဦးစားမပေးသေးဘဲ၊ “မြန်မာ” ဆိုသည့် စာရင်းနှင့် လူဦးရေ အတိအကျ တစုတစည်းတည်း ကောက်ယူနိုင်ပြီး အမေရိကန်တပြည်လုံးတွင် အတိအကျ ထင်ရှားလာစေရေး ဆောင်ရွက်နိုင်ကြရန် အားလုံးက ၀ိုင်းဝန်းဆွေးနွေး ကြသည်ကို တွေ့ရသည်။


ယခု အလွတ်သဘောတွေ့ဆုံပွဲမှာ နေ့ခင်း ၂ နာရီမှ ညနေ ၄ နာရီအတွင်း ၂ နာရီ အချိန်အတွင်း တက်ရောက်သူ လူဦးရေ ၂၅ ဦးခန့်နှင့် ကျင်းပခဲ့သည်။ တဦးလျင် စကားပြောချိန် ၃ မိနစ်မှ ၅ မိနစ်အတွင်း အလှည့်ကျ စာရင်းသွင်း ဆွေးနွေးပြီး ဆွေးနွေးပွဲ ကြည့်ကြပ်သူအဖြစ် ကျောင်းထိုင်ဆရာတော် ဦးဓမ္မပီယက မေတ္တာဖြင့် ဆောင်ရွက်ပေးသည်။


အားလုံးက ထပ်မံ တွေ့ဆုံလိုကြပြီး ယခုထက်ပိုမို၍ နောက်ထပ်စိတ်ဝင်စားသူ တိုင်းရင်းသားများ၊ ဘာသာရေး အစုအဖွဲ့များ၊ အခြား အစုအဖွဲ့ပေါင်းစုံ ၀ိုင်းဝန်းပါဝင်လာရေး၊ တဦးချင်းဖြစ်စေ အဖွဲ့လိုက်ဖြစ်စေ လိုက်လံ ဖိတ်ကြားနိုင်ရေး၊ မိမိတို့ မြန်မာမိသားစု အသိုင်းအ၀ိုင်းများအတွင်း ကျယ်ကျယ်ပြန့်ပြန့် သိရှိနားလည် ဆောင်ရွက်လာစေရေးအတွက် ပညာပေးရေး၊ စည်းရုံးရေး၊ သတင်းဖြန့်ချိရေးတို့ကို မြန်မာတမျိုးသားလုံးက တယောက်တလက် ဆောင်ရွက်ကြရန် စဉ်းစားကြသည်။


အလွတ်သဘော တွေ့ဆုံသူများအားလုံးက နောက်တကြိမ် ထပ်မံတွေ့ဆုံကြရန်၊ ယခုထက်ပိုမို၍ လူအများ ပါဝင်နိုင်ရေး လိုက်လံဖိတ်ခေါ် အကြံတောင်းကြရန် သဘောတူကြသည်။ ဘေးဧရိယာ မြန်မာမိသားစုများနှင့် တကွ နီးစပ်ရာ စာဖတ်သူများအားလုံးကို စတင် သတင်းပေးရန် အသိပေးရန်အတွက် မိုးမခ စာနယ်ဇင်းအဖွဲ့ကို ခွင့်ပြုသဖြင့် ယခုသတင်းကို တင်ဆက်လိုက်ခြင်း ဖြစ်ပါသည်။


မိုးမခ မှ ပြန်လည်ကူးယူဖော်ပြပါသည်။